Денеска по тринаесет часот градоначалникот на општина Центар, Саша Богдановиќ, очекува да го добие резултатот од тестот за коронавирус. Тој заедно со уште неколкумина вработени во Општината кои имале контакт со Маја Ралевска, секретар на Општината позитивна на Ковид-19, денеска работат од дома.
„Вчера ми направија тест откако дознавме дека секретарот Ралевска е позитивна. Преземени се сите мерки за претпазливост, ние постојано сме со маски, се дезинфицира, а и таа доаѓаше на сите состаноци со маска. Не верувам дека ќе има некој заразен, но, сепак, моравме да се тестираме. Се работи за околу 6 – 7 луѓе кои сме биле во контакт со Ралевска. Во Општината нема други заболени, а Ралевска најверојатно се заразила дома од сопругот, кој исто така бил позитивен“, изјави градоначалникот Богдановиќ за „А1он“.
На работа во Центар градоначалникот вели дека не доаѓаат само луѓето кои со мерките се ослободени од работа, односно родители на деца до 10 години, бремени и хронично болни.