Градоначалникот на општина Центар Саша Богановиќ се обрати на собирот на 25-те збратимени градови со општината Бијоглу во Истанбул.
„Центар и Бијоглу имаат многу заеднички работи. Двете општини се лоцирани во централните јадра на Скопје и на Истанбул што значи дека делиме заеднички проблеми и предизвици. Сепак, Бијоглу е многу поголема општина од Центар и сметам дека размената на искуства и идеи со вашата администрација ќе биде од огромна корист за нас.
Центар се соочува со низа предизвици меѓу кои најголеми се сообраќајниот метеж, загадувањето, урбанистичкиот хаос. Јас и мојот тим ветивме дека посветено ќе работиме на надминување на овие проблеми. Токму затоа би сакале да чуеме како вие се справувате со овие проблеми и да се обидеме дел од вашите решенија да имплементираме во Центар.
Исто така, убеден дека двете општини имаат многу поголем потенцијал за зајакнување на економската и културната соработка. Македонија и Турција се традиционално пријателски земји и мораме оваа врска да ја искористиме за зацврстување на врските меѓу Центар и Бијоглу.
Сметам дека ваквите заеднички средби не треба да бидат само куртоазна размена на пофални зборови туку конструктивна размена на идеи и основа за воспоставување реална соработка која ќе им донесе добро на жителите на нашите општини.
Градоначалнику Демирчан, ќе ни претставува особена чест во блиска иднина да бидете наш драг гостин и да го почувствувате духот на Центар. Се надевам дека заедничките средби ќе станат редовна пракса и ќе прераснат во соработка на конкретни заеднички проекти со што ќе го оправдаме епитетот збратимени општини“, рече градоначалникот на општина Центар, Саша Богдановиќ.