Градоначалникот на Општина Центар, Саша Богдановиќ, му порача на инвеститорот на катната гаража „Никофон“, Никола Настески, дека тој и Општината се подготвени за договор и го повика на разговор во својот кабинет.
„Би сакал на Никола Настески, инвеститорот на катната гаража Никофон, но и на целата јавност, да порачам дека и јас и Општина Центар сме подготвени за разговор и договор. Јас и жителите од околните згради сметаме дека таму, на тоа место, катна гаража не треба да има. Во тоа име, како прв човек на една транспарентна, отчетна и општина одговорна пред граѓаните, го повикувам Никола на разговор во мојот кабинет, за еднаш засекогаш да најдеме решение за овој голем проблем за жителите на Центар, но и на сите граѓани на Скопје“, напиша Богдановиќ на својот Фејсбук профил.
„1 милион евра е премногу, но отворени сме за дијалог. За да ја утврдиме сумата ќе бараме и вештачење“, изјави за „А1он“, градоначалникот на Општина Центар, Саша Богдановиќ.
Настески вчера за „А1он“ изјави дека за парцелата платил 127.000 евра на државата, но заедно со комуналите, проектот и другата документација за катната гаража, сумата што досега ја потрошил се искачила на приближно 1 милион евра. Тој рече дека биле свесни за револтот на граѓаните и од тие причини безмалку една година преговарале со Општина Центар за размена на постојната со друга недвижност, согласно законските прописи, но не наишле на разбирање од страна на Општината. И покрај неуспешните преговори, Настески вчера рече дека се отворени за дискусија и изнаоѓање на взаемно прифатливо решение.