Македонија изгуби пријатели внатре во Европската Унија поради процесот на антиквизација и провокациите, вели за А1 професорот на Југоистично европските студии на Универзитетот во Грац, Флоријан Бибер.
-Кога зборувам со луѓе од министерствата за надворешни работи или со луѓе од Европската Унија тие честопати велат „ Разбираме дека Македонија има повеќе права во конфликтот со Грција, но што тие сега работат, тие постојано ја провоцираат Грција и ние не разбираме зошто тие го прават тоа. Разбираме дека чекаат 15 години и оти ништо не се случи“. Не е паметно мала држава на таков начин да го засилува отпорот кон Грција. И тоа многу луѓе во Европската Унија не го разбираат. Тоа го сфаќаат како влошување на проблемот. Ова оди во корист на Грција, а не во корист на Македонија, бидејки Грција може да живее со оваа статус кво ситуација“ вели Бибер.
Процесот на антиквизација е вештачки и проблематичен вели професорот Бибер.
-Сметам дека е ова многу опасен процес и не е паметно за една влада да си игра со тоа. Јас прашањето на минатото би го оставил на историчарите.Не е на политичарите да се занимаваат со тие прашања.Тоа никогаш не е добра идеја. Јас мислам дека се вложуваат многу пари и енергија во нешто што е непотребно и води во правец кој е бескорисен и со одредени опасности. Дали процесот на антиквизацијата е многу опасен за Македонија? Јас мислам дека е, рече Бибер.
Излез од кризата помеѓу Македонија и Грција е многу тешко да се најде и единствен начин да се дојде до решение е поголемите членки на Европската Унија да извршат притисок врз Грција додава професорот Бибер.
-Според мене идејата преку преговори да се реши тој проблем е нереален, затоа што преговорите функционираат секогаш кога и двете страни имаат интерес за решение. Јас прашувам кој е интересот на Грција за решение? Ако го гледате успешниот дијалог помеѓу Србија и Косово, тој беше успешен само затоа што ЕУ им понуди на двете држави нешто, а особено на Србија. Зошто Србија прифати промена на статус кво ситуацијата? Прифати затоа што добија нешто. Зошто Грција би прифатила нешто што не е во нивни интерес?Статус кво ситуацијата им одговара најмногу на нив“ вели Бибер.
Мики Трајковски