Нехумано се третираат бездомните кучиња што се заловуваат во Кочани, без да се почитуваат законските одредби, обвинија на денешната прес-конференција активистите од Здружението за заштита на животните „Втора шанса“. Според нив, поголем број животни се чуваат во заеднички кафези, се оставаат без вода и храна, па често се случува да пцовисаат.
– Заловувањето на кучињата од улиците го врши оператор од Куманово кому му е истечен договорот за давање на услугата, а доставил фактури за извршено вакцинирање, иако кучињата биле еутаназирани. Ниту едно куче што било третирано нема маркица за кастрација, стерилизација и вакцинација, ниту пак е вратено во реонот каде што е заловено, истакна Александра Арсова, активист во Здружението.
Активистите за заштита на животните покажаа фотографии од пцовисани кучиња, а доставиле и пријава за несоодветниот превоз на заловените животни. Нивна проценка е дека во Кочани има околу 200 бездомни кучиња, од кои дел се донесени од други градови каде работи истиот оператор.
Од Здружението „Втора шанса“ побараа Општина Кочани да овозможи услови за отворање стационар со ветеринар и доволен простор за згрижување на заловените кучиња.