Поради дефект на регионалниот водовод Лукар од кој неколку општини од Тиквешијата добиваат вода за пиење која се носи педесетина километри од под планината Кожуф, утре 12 часа без вода ќе останат жителите од повисоките делови на градот Кавадарци.
– Поради отстранување на дефектот, без вода за пиење ќе останат жителите од повисоките делови на градот и тоа во временскиот период од 12 до 24 часот. Во истиот временски интервал, во пониските делови на Кавадарци водоснабдувањето ќе биде со помал притисок, информираа денеска од кавадаречкото јавно претпријатие „Комуналец”.
Оттаму побараа разбирање од страна на граѓаните, кои ќе се соочат со немањето на вода за пиење, или намален притисок на вода во чешмите.