Министерот за одбрана на Република Македонија, Фатмир Бесими и заменик-амбасадорот на САД во Република Македонија Брајан Агелер, денеска на Попова Шапка ќе присуствуваат на заедничка обука и едукација на специјалните сили на АРМ и вооружените сили на САД (ЈЦЕТ).
Целта на обуката е размена на искуства меѓу специјалните сили, подобрување на стандардите и обученоста на декларираните тимови на Полкот за специјални операции за војување во зимски услови, како и обновување на техниките и процедурите за борба во урбана средина, користејќи ги искуствата од специјалните операции во Авганистан.
Обуката меѓу армиите на Република Македонија и на Соединетите Американски држави се реализира во периодот од 1 до 28 февруари, и тоа на две локации. Првиот дел од обуката „Борба во зимски услови“ е на Попова Шапка, додека вториот дел од обуката „Индивидуална обука/ борба во урбана средина“, ќе се реализира на АП „Криволак“.
Соработката во областа на одбраната помеѓу Република Македонија и Соединетите Американски Држави се развива уште од 1994 година, кога беше потпишан Меморандумот за соработка во областа на одбраната, трет по ред по Меморандумите за соработка со Словенија и Турција, додека во 2008 година потпишана беше и Декларацијата за стратешко партнерство.
Низ досегашните проекти за соработка и обука, во одбранбениот систем на Република Македонија вложени се над 128 милиони американски долари со што во голема мера се придонесе кон достигнувањето на највисоките стандарди на интероперативност. Потврда за тоа беше и заедничката деветмесечна мисија „Феникс“ кога припадници на АРМ заедно со Националната Гарда на Вермонт спроведуваа комплексна мисија на обука и менторирање на авганистанските безбедносни сили.
Досега од страна на САД одликувани се вкупно 152 припадници на Армијата на Република Македонија.