Приоритетите на ОБСЕ во регионот и особено Македонија и реализираните активности на организацијата во изминатиот период во земјата, биле теми на денешната средба во Скопје на министерот за одбрана Фатмир Бесими со Кнут Волебек, висок комесар за национални малцинства при ОБСЕ.
Како што соопшти Министерството за одбрана, министерот Бесими информираше за континуираните реформски процеси во одбраната согласно стандардите на НАТО алијансата, кои се реализираат согласно предвидените планови, истовремено посочувајќи дека продолжува и процесот на унапредување на правичната застапеност на етничките заедници согласно Програмата и Акцискиот план за соодветната и правична застапеност на етничките заедници во Република Македонија. – Воедно, истакна министерот, Армијата на Република Македонија, како институција со најголема доверба кај граѓаните, претставува модел за инклузивниот пристап во едно развиено мултиетничко општество, се вели во соопштението.
За време на средбата, високиот комесар за национални малцинства на ОБСЕ, пак, истакнал дека интеграцијата, како афирмативен аспект во мултинационалните општества е вистинскиот пат за градење меѓусебна доверба и одржлива стабилност и развој.
Организацијата за безбедност и соработка во Европа има сеопфатен пристап кон безбедноста, со кој се опфаќаат политичко-воените, економските, еколошките и човечките аспекти – контрола на оружјето, мерки за градење доверба и безбедност, човекови права, национални малцинства, демократизација и сл.