Препораките на ОБСЕ/ОДИХР кои се однесуваат на Изборниот законик ќе се исполнат, изјави денеска министерот за правда Блерим Беџети одговарајќи на новинарско прашање по отворањето на затворот „Куманово“.
– Исполнети се дел од препораките на ОБСЕ/ОДИХР кои се однесуваат на локалните избори и сега продолжуваме со исполнување на препораките во однос на претседателските и парламентарните избори, рече Беџети.
Тој додаде дека за имплементирањето на препораките работат две работни групи, едната во Министерството за правда, а другата во Државната изборна комисија.
– За прочистувањето на избирачкиот список работи Работната група во ДИК. Министерството за правда како ресорно министерство ја следи работата на оваа Работна група во која има претставници и од Управата за водење на матична евиденција која е во состав на Министерството за правда. Се работи интензивно, рече Беџети.
Тој потсети дека на последните избори немаше забелешки од ниту една политичка партија во врска со прочистувањето на избирачкиот список. – Се работи во континуитет, бидејќи станува збор за жива материја, истакна Беџети.
На прашање за екстардицијата на Миле Хаџиски и првообвинетите во случајот „Монструм“, министерот за правда одговори дека за сите екстрадиции се постапува согласно законските надлежности.
– Во постојана комуникација сме со надлежните институции за екстрадицијата на Хаџиски, како и за сите останати случаи за екстрадиција, согласно законите и договорите што ги имаме потпишано со другите држави, додаде Беџети.