Во рамки на манифестацијата „Крива Паланка град на културата за 2013“ вечер на градскиот плоштад во Крива паланка ќе се одржи второто издание на рок-фестивалот „Џој-фест“, на кој ќе настапи рок-легендата Мимчило Бајагиќ – Бајага.
Годинашниот „Џој-фест“ ќе понуди одлична програма за љубителите на рок-музиката, а покрај Бајага и неговите инструктори, ќе настапат и неколку веќе етаблирани рок-бендови од земјава : Ептен, алтернативен рок-состав од Куманово, Foolish Green од Скопје, Conquerin Lion, хард-кор состав од Тетово и Smokeshakers, инди – рокери од Кавадарци .
Бајага и Инструктори пристигнаа вчера, а денес на пладне имаа прием кај градоначалникот на Крива Паланка, Арсенчо Алексовски.
– Премиерното издание на Џој-фест минатата година ги сплоти сите поранешни и постојни рок-бендови од нашата општина, а годинава се зафативме со организацијата многу по амбициозно и донесовме звучни имиња со надеж дека Крива Паланка ќе добие уште еден настан кој ќе стане препознатлив бренд, рече Александар Михајловски, член на органзииацискиот одбор на фестивалот.
Целовечерниот настан се очекува да ги собере обожавателите на рок-музиката од сите краишта на Македонија, а органозаторите предвидуваат над 10.000 посетители.
Фестивалот ќе започне во 19 часот.