Агенцијата за аудио и аудиовизуелни медиумски услуги констатираше дека кампањата за „сите пре-еманципирани жени“ во продукција на Сити Радио, Клуб ФБ и Метрополис Радио Мрежа, претставува дискриминација врз основа на пол, ширење мизогинија и сексизам.
Од АВМУ констатираат дека се крши Законот за аудио и аудиовизуелни медиумски услуги и дека радиодифузерите кои ја продоцуирале оваа кампања, се однесуваат на начин кој е непоимлив и целосно неспојлив со професионално однесување.
Во кампањата, еманципацијата на жените и на мажите се поставуваат како два процеси кои меѓусебно се исклучуваат, се вели во соопштението на АВМУ.
– Еманципацијата и стремежот на жените да го достигнат максимумот во своите кариери се претставува како негативна појава, успешните жени се подложуваат на потсмев и омраза, а на децата и младите од обата пола им се испраќа порака дека не се еднакви и дека не треба да се стремат кон еднаквост, велат од АВМУ.
До трите радија биле упатени известувања за констатирано прекршување на Законот.