На повеќе локации во Крива Паланка, и околните населби се работи на асфалтирање на делови од улици и одржување комунална инфраструктура.
Од локалната самоуправа на општината информираат дека Одделението за изградба и одржување на комунална инфраструктура интензивно работи на повеќе локации во градот и селските населби на различни градежни активности.
– Продолжува интензивно реализацијата на проектот за замена на азбестно цементните цевки, во тек се активности на дел од улицата „8-ми Октомври“. На истата улица се врши и санација на руиниран стар потпорен ѕид, а во наредниот период се планира и поставување на нов слој на асфалтен коловоз на дел од улицата. Санација на потпорни ѕидови е направена на улиците „Ристена Гогова“, „Калин Камен“ и „Јане Јакимовски“, информираат од општината.
Посочија дека по поројните дождови што ја зафатија општината, работено е на санација и тековно одржување на локалната патна мрежа. Санирани и тампонирани се земјани патишта во атарот на селата: Мождивњак, маала Серафимовци, село Т‘лминци, каде покрај санација на патот е поставена и нова водоводна линија од 500 метри, Кошари, Варовиште, Костур.
Во тек се и активности за крпење на ударни дупки и санација на делови од улици во градското подрачје, а оваа активност во наредниот период ќе се интензивира, поради што од општината апелираа граѓаните да бидат претпазливи и да имаат разбирање за отежнатото одвивање на сообраќајот, на локациите каде се работи.