На воениот стадион во Градскиот парк во Скопје утре ќе биде одбележан Денот на Армијата, а свеченоста ќе се реализира во согласност со протоколот на Комисијата за заштита од заразни болести за одбележување државни празници, информираат од Министерството за одбрана.
Како што најавија од Генералштабот на Армијата, обраќања ќе имаат претседателот на Република Северна Македонија и Врховен командант на Армијата, Стево Пендаровски, министерката за одбрана, Радмила Шекеринска и началникот на Генералштабот, генерал-потполковник Васко Ѓурчиновски.
На свеченоста, од страна на претседателот Пендаровски со Орден за воени заслуги ќе се одликуваат баталјонот за воено-медицинска поддршка, третиот пешадиски баталјон од првата пешадиска бригада и канцеларијата за соработка со одбраната на САД.
Свеченоста ќе биде пренесувана во живо на првиот програмски сервис на МТВ, како и на страниците на шефот на државата, Министерството за одбрана и Армијата на Република Северна Македонија на Фејсбук.
