Апелацискиот суд одлучи да го одбие барањето на обвинетиот експремиер Никола Груевски за одложување на седницата поради отсуство на неговите адвокати.
Бранителот на помошникот – министер во МВР, Ѓоко Поповски, Стерјо Зиков во име на четворицата адвокати на Груевски побара изземање на Судскиот совет. Согласно барањето на одбраната, Судскиот совет даде 30-минутна пауза по која ќе се одлучува за барањето.
„Доколку не се овозможи бранителите на Груевски да бидат присутни на седницата, со тоа сериозно се загрозува правото на одбрана”, рече Зиков.
Претходно судијката Цветанка Перишиќ одлуката да се одбие барањето за одложување на седницата ја образложи со тоа што неприсуството на адвокатите на Груевски е нивна лична одлука и дека не е причина за да се одложи седницата. На оваа одлука имаше примедба адвокатот Стерјо Зиков кој рече дека адвокатите не можат да дојдат поради обврски со судењето за случувањата на 27 април.
Зиков побара заеднички да најдат термин, со цел непрекинато да се одвива седницата на која се одлучува за затворските казни за екпремиерот Груевски и за високиот функционер на МВР, Поповски.
Груевски кој присуствуваше на денешната седница рече дека има ангажирано цело адвокатско друштво кое случајот го разгледува од повеќе аспекти и дека е неопходно неговата одбрана на биде присутна на седницата на која се разгледуваат жалбите.
Виктор Јованов