Апелационите судии во Скопје ја укинаа пресудата за ексначалникот на Петтата управа во УБК, Горан Грујевски, во предметот „Тврдина 2“, дознава „Макфакс“.
Со пресудата, бегалецот во Солун беше осуден на година и пол затвор за уништување списи и документи за незаконското прислушување. Тоа значи дека за овој предмет, судењето за Грујевски треба да почне од почеток. Oва е одлуката на тричлениот кривичен совет со кој претседаваше судијката Цветанка Периќ за жалбата на адвокатите на Грујевски. Јавната седница се одржа годинава кон крајот на март.
Причината за укинувањето на пресудата за случајот „Тврдина 2“, која ја донесе судијката Лидија Петровска, позната од бомбите, е тоа што не биле исполнети законските услови за на обвинетиот Грујевски да му се суди во отсуство. Според сознанијата на „Макфакс“, Апелациониот суд ја потврдил пресудата за службеничката во УБК, која исто така се жалеше, но на условната казна која ѝ беше досудена во овој предмет.
Судијката Лидија Петровска во октомври 2017 година донесе решение со кое на обвинетиот Грујевски одлучи да му се суди во отсуство бидејќи тогаш им беше недостапен на органите на прогонот. Со оглед на фактот дека судијката Лидија Петровска, која го судеше предметот, е преместена во друг оддел, сега предметот најверојатно ќе го суди судијката Добрила Кацарска, која ги презеде предметите од својата колешка и која го осуди Никола Груевски на 2 години затвор за набавката на „мерцедесот“. Предметот сè уште не е експедиран во кривичниот суд, потврдија оттаму за „Макфакс“.
Грујевски, инаку е обвинет и во случајот за масовното прислушување „Тврдина – Таргет“ и во предметот „Трезор“, а против него СЈО ја води истрагата „Странски служби“, за набавка на опремата за прислушување.
Васко Маглешов