Антикорупциската комисија ги охрабрува граѓаните, невладините организации и медиумите да ги пријавуваат сите неправилности во изборната кампања за избор на претседател и локалните избори во Охрид, Дебар и Ново Село.
Од комисијата потсетуваат дека во периодот од 20 дена пред почетокот на кампањата па се до изборот на претседател и градоначалник, не може да се одржуваат јавни настани по повод изградба и пуштање во употреба објекти изградени со буџетски пари, водоводи, училишта, градинки и сл. Забрането е да се користи канцелариски простор и опрема, како и службени возила на државни органи за изборни цели.
ДКСК ќе го истражува ќе врши контрола на буџетските пари и ќе го следи финансирањето на изборна кампања, по сопствена иницијатива, по поднесен приговор од организатор на изборна кампања или од акредитирани набљудувачи.
На веб-страницата на Антикорупциската комисија објавена е формата на Пријава за сомневања за незаконитости и прекршувања во изборниот процес која може да ја пополни секој кој има информации дека се злоупотребуваат буџетски средства за изборни цели, ако се вршат обиди за притисоци и закани врз гласачи, ако се почнува со изградба на јавни објекти, водоводи, училишта, патишта или ако се исплатуваат пензии, социјална помош и плати кои не се редовни месечни исплати.
На веб страницата на ДКСК е објавен регистар на возила на државни органи, на општини и на јавни претпријатија, со регистарски таблички. Од комисијата повикуваат секој што ќе детектира залоупотреби на возила за изборни цели, да го пријави случајот во ДКСК.
Мери Јордановска