Зошто пратениците од ВМРО-ДПМНЕ не презедоа ништо кога Талат Џафери молчеше со денови и кога им читаше поезија, или пак, молчењето на Џафери беше договорено меѓу нивните лидери, праша денеска лидерот на Достоинство, Стојанче Ангелов.
– Достоинство им дава целосна поддршка на СДСМ за блокадата на буџетот. Доста се трошеа пари за глупости во истиот период додека граѓаните немаат пари да си купат леб. Со предлогот на СДСМ ќе нема пари за владини реклами, за економски промоции, за фонтани и споменици, за нови објекти од „Скопје 2014“, за нов мебел, нови возила и нови згради за Владата и министерствата и ќе се заштедат најмалку 205 милиони евра. Колкаво е лицемерието на ВМРО-ДПМНЕ се гледа и од нивниот однос кон бранителите – изјави Ангелов.
Тој вели дека се согласни со ставот на СДСМ доколку во Изборниот закон не се направат неопходните измени и не се вградат препораките на ОБСЕ и ОДИХР, и доколку не се исчисти Избирачкиот список, да не се учествува на претстојните локални избори.