Балканско-американската студентска асоцијација при Универзитетот „Џорџ Вашингтон“ во САД, ги поддржа студентите во Македонија во борбата за нивните неприкосновени права како студенти.
На фејсбук страницата на Стуентскиот пленум објавено е писмо со поддршка во кое, асоцијацијата изразува поддршка за барањата што студентскиот пленум ги упати кон министерот за образование Абдилаќим Адеми.
„Попрецизно, ги поддржуваме вашите тврдења дека екстерното тестирање, односно државниот испит во втора и четврта година на факултетите би било против уставно загарантираните права на граѓаните на Република Македонија и дека би ја ограничило автономијата на универзитетот како независна институција. Освен тоа, застануваме зад вашата осуда на Студентскиот парламент при УКИМ кој несоодветно ги брани правата на студентите на овој универзитет. На крајот, ги поддржуваме вашите тврдења, дека студентите не беа соодветно информирани ниту вклучени во било какви дискусии или дебати околу горенаведеното тестирање. Ве охрабруваме да го продолжите вашето движење и борба против неправичното тестирае како и борбата за севкупните права на студентите во Република Македонија. Наша должност е, како студенти да ги бараме своите права, било да се работи за тестирањата, условите за домување, квалитетот на образованието што ни се нуди, или кој било друг аспект од студентскиот живот. Образованието е извор за позитивна промена и мора да остане такво. Од Соединетите Американски Држави до Република Македонија и насекаде во светот студентите се борат против неправдите, трагајќи по проширени знаења, вештини и способност да станат критичко-мислечки граѓани. Мораме да запаметиме дека ние сме идната генерација на оваа планета и нашиот збор мора да се важи во иднината. Самите мораме да решаваме за нашата иднина, а не да им дозволуваме на други да решаваат за нас“, пишува во ова писмо.