Амбасадорката на Босна и Херцеговина, Лепа Бабиќ денеска со претставници на општините Бјелина, Невесиње, Котор, Варош и Бања Лука ја посетија локалната самоуправа на Прилеп.
Главната цел на посетата, како што рече прилепскиот градоначалник Марјан Ристески, е применувањето на позитивното искуство на општина Прилеп за искористувањето на средствата од ЕУ-фондовите.
– Посетата на општина Прилеп е поради тоа што во Македонија, Прилеп има искористено најмногу средства од ЕУ-фондовите и разните фондации. Денеска претставниците на општините од Босна и Херцеговина ќе се дружат со службите на општина Прилеп и ќе разменуваат искуства. Разменивме позитивни искуства и мислења околу искористувањето на ЕУ- фондовите и како подобро да се користат средствата од општините во реализација на проекти во корист на граѓаните, изјави Ристески.
На средбата била договорена и заедничка идна соработка на бизнис секторот. – Се надевам дека тие ќе имаат добар престој во Прилеп, дека ќе стекнат многу позитивни искуства, но и ние имаме што да научиме од работењето на општините во Босна и Херцеговина, додаде Ристески.
Ова е втора официјална посета на амбасадорката Лепа Бабиќ на Прилеп.
– Прилеп беше и првиот град кој јас го посетив откако дојдов на оваа функција во Македонија и оттогаш потекнува нашата соработка. Денеска во Прилеп се дојдени претставници на нашите општини да разговараат со луѓето одлокалната самоуправа, да се видат позитивните и негативните искуства, но и да ја продолжиме соработката која во иднина ќе биде поголема, рече Бабиќ.
Претставниците на општините од Босна и Херцеговина со општина Прилеп договорија соработка во повеќе области од општественото живеење.