Погребот на Александар Карадакоски, кој е 60-та жртва во трагичниот пожар во дискотеката „Пулс“, ќе биде утре на Градските гробишта во Кочани.
Семејството веќе ги извести роднините и пријателите дека неговото тело од 12 часот ќе биде изложено во капелата пред гробиштата, а погребната церемонија ќе се одржи во 14 часот.
Претходно од Министерството за здравство информираа дека Карадакоски се здобил со тешки изгореници на главата, вратот и рацете, а му биле констатирани и сериозни повреди на дишните патишта. Во критична здравствена состојба беше пренесен на лекување во Литванија, каде почина по тешка инфекција и нарушување на функцијата на бубрезите.
Заради спроведување обдукциски наод, неговото тело вчера беше пренесено на Институтот за судска медицина во Скопје.
Како управител во „Пулс“, тој беше опфатен со наредбата за спроведување истражна постапка, но во меѓувреме Основното јавно обвинителство – Кочани донесе наредба за запирање на истрагата за него.