Носителот на листата кандидати за пратеници од „Коалиција за промени и правда-трет блок“ во ИЕ5, Александар Делов на прес конференција во Битола ги презентираше програмските цели и обврски кои ќе ги преземе доколку стане пратеник во Собранието на Република Македонија.
Делов изјави дека „Коалиција за промени и правда-трет блок“ посебно се загрижени за како што рече „белата чума“ во Македонија, односно масовното иселување на младите од Битола, Охрид, Струга, Демир Хисар и Кичево.
– Во последните 5 години од Битола се иселени над 30.000 граѓани, од Ресен се иселиле над 1.900 жители, а од Охрид иселени се околу 8.000 жители. Срамно е за една држава нејзините граѓани да вадат пасоши на други држави за да бараат спас надвор од својата родна грутка. Ние се бориме за да ја вратиме и задржиме младината и да им обезбедиме пристојни услови за работа, истакна Делов.