Продолжува цврстата поддршка за Република Македонија во нејзините напори за членство во евроатлантските институции за каде што ги има исполнето сите критериуми предвидени со актите и на НАТО и на ЕУ. Ова е заедничката порака од државниот врв на Република Албанија што беше искажана на средбите кои денеска ги имаше министерот за одбрана на Република Македонија Талат Џафери во Тирана со претседателот Бујар Нишани, претседателката на Собранието Џозефина Топали, премиерот Сали Бериша и министерот за одбрана Арбен Имами.
– Ги поддржуваат нашите напори за изнаоѓање одржливо и прифатливо решение околу прашањето за името што постои со јужниот сосед, изјави министерот Џафери по средбата со премиерот Бериша,јави известувачот на МИА.
Заедничка е и определбата да се продолжи и соработката во билатералните, регионалните и пошироко проекти меѓу министерствата за одбрана и армиите на двете држави.
– Треба и понатаму со заеднички напори да продолжиме да бидеме дел од настојувањата за изнаоѓање и продуцирање мир и демократија во регионот и во светот таму каде што ние учествуваме, рече министерот Џафери.
На средбата со министерот за одбрана Имами разговарано е и за изнаоѓање можни решенија за заедничко учество во постмисијата ИСАФ 2014 година. Таквото понатамошно учество во мисиите, се согласиле Џафери и Имами, меѓу другото ќе придонесе за намалување на трошоците за учество во мисиите надвор од нашите држави.
Билатералната соработка меѓу двете министерства за одбрана и армиите ќе се продлабочува и преку размена на искуства, обуки и едукации како на полигонот „Криволак“ и центрите за комуникации и за обука на пилоти во Македонија, така и во Тирана во Командата за обука и доктрини.
Министрите за одбрана на Македонија и на Албанија изразија надеж дека набргу ќе се реализира и проектот за воздушна контрола. Отворена е и можноста за формирање регионално координативно тело за справување со природни катастрофи за да се овозможи побрза и поквалитетна реакција од страна на постоечките капацитети.