Пред почетокот на денешната седницата на Советот на општина Центар, советничката група на СДСМ и коалицијата го искажа својот револт и осуда за вандалскиот чин со сечењето на дрвјата во универзитетскиот кампус.
„Како секогаш досега, оваа власт ноќе уништува, а дење глуми дека гради, па така во време на викенд во 2 часот и 30 минути по полноќ, властите се дрзнаа и навлегувајќи во автономијата на универзитетот, исекоа 47 дрва“, рече советникот и координатор на советничката група на СДСМ и коалицијата, Игор Алаџајков.
Иронијата да биде поголема, додаде Алаџајков, тој ден се одработуваше „Денот на дрвото“ додаде Алаџајков и веднаш беше организирана контра-акција за садење не на дрва, туку на грмушки.
„Па дури и да засадевте дрва, знаете ли колку години му е потребно на едно дрво за да порасне. Забеганоста на власта оди дотаму што ова го направи во деновите кога Скопје е рекордер во загаденост во светот. Страшно е што власта мора да го дише овој ист воздух и да ги труе, освен нас сите – и своите деца“, доврши Алаџајков.
Оттука, советничката група на СДСМ и коалицијата бара од надлежните да го сопрат ова лудило и наместо смешните потези со прскање на улиците, да ги преземат вистинските чекори, бидејќи сите ние имаме право на чист воздух.