Активистката Моника Ристеска која денес беше изведена пред судија на претходна постапка, а потоа и беше изречен притвор, се огласи на социјалните мрежи.
„Не ме барајте, до привор сум 30 дена“, напиша Ристеска на нејзиниот Фејсбук профил.
При вчерашниот претрес во нејзиниот дом, полицијата пронашла 30 милилитри. масло од канабис и 15 грама канабис. По барање на Обвинителството, судијата донесе одлука за 30 дневен притвор на Ристеска.
Утре во 12 часот, пред Основното јавно обвинителство, група граѓани ќе протестираат против како што велат, прогонот на Моника Ристеска. Тие велат дека пристапот на судијата кој на активистката Ристеска и одреди триесетдневен притвор е ригиден и неприфатлив.
„Ги повикуваме сите слободоумни граѓани и оние кои се, но и оние кои не се уживатели на канабисот да дојдат на протест пред Основното Јавно Обвинителство-Скопје во 12:00 часот. Целта е да го изразиме нашето незадоволство и да ја искажеме нашата поддршка за неправедно затворената Моника“, пишува во најавата на социјалните мрежи која ја објави здружението „Билка“.
Ристеска во изминативе месеци јавно се залага за слободна употреба на марихуаната и маслото од канабис.