Министерството за животна средина наскоро ќе започне со подготовка на акциски план за развој на Мариово. Станува збор за проект најавен пред неколку години, при што општините од регионот, а особено Општина Прилеп, ќе направат план за ревитализација на овој крај.
Се планира издавање туристички водич, за во наредниот период да се развие селскиот туризам во Мариовско, кое располага со огромни природни богатства и здрава животна средина.
Посебен акцент се става и на развојот на манастирскиот туризам, бидејќи Мариово изобилува со огромен број цркви и манастири: 59 цркви и 29 манастири, од кои поголем број се под заштита.
Од локалната самоуправа во Прилеп истакнуваат дека презеле повеќе активности за заживување на овој крај, меѓу кои и подобрување на патната инфраструктура до селата во Мариово. Моментално две села,Бешиште и Полчиште остануваат без патна врска.
Мештаните, пак, истакнуваат дека мариовските села изумираат чекајќи инвеститори за развој на селскиот туризам.
А.Ш.