Општина Центар, во соработка со Градот Скопје и ЈП Комунална Хигиена организира голема акција под мотото „За чиста општина Центар“, што ќе се проведе во периодот од 11 до 13 јули.
Целта на акцијата е да се исчисти отпадот на целата територија на општината. Акцијата ќе опфати чистење на диви депонии и ѓубришта на различни локации, како и собирање и отстранување на кабаст отпад од домаќинствата, со механизација и работници од ЈП Комунална Хигиена. Во акцијата учество ќе земат и работниците за јавни работи, ангажирани од општина Центар, со потребен алат и опрема.
На територијата на општина Центар, одредени се 5 реони за собирање отпад – строго централно подрачје, Буњаковец, Дебар маало, Капиштец и Водно, Пролет, Маџир маало и Крњево. Во секој реон одредени се по пет локации на кои ќе се постават големи контејнери од пет тони за кабаст отпад.
Точните локации за секоја населба и временските термини за исфрлање на отпадот ќе бидат јавно објавени на веб страницата на општината и во јавните гласила, како и со поединечни соопштенија на станбените објекти, 10 дена пред започнување на акцијата.
