Кумановци денеска донираат храна за ранливите категории граѓани во рамки на иницијативата на „Ајде Македонија“ и националната хуманитарна акција „Нахрани 10.000“.
Општинската организација на Црвен крст Куманово и здружението “Инклузива” од Куманово во соработка со граѓанските асоцијации „Ајде Македонија” и „Мрдни со прст“ пoд мотото „Сите сити” заеднички ја организираат хуманитарна акција за помош на ранливите семејства по повод меѓународниот ден за борба против гладта, 16-ти октомври.
– Акцијата започна точно во 10:00 часот и се одвива според планираното. Сите заинтересирани граѓани и претпријатија од Куманово кои сакаат да се вклучат и дадат свој придонес во акцијата можат да донираат до 19:00 часот пред маркетите „Тинекс” и „Елида”. Храната која ќе биде донирана, ќе биде спакувана во пакети и дистрибуирана до најзагорзените социјално ранливи семејства од општините Куманово, Липково и Старо Нагоричане, изјави секретарот на општинската организација на Црвениот Крст, Бојан Петрушевски.
Националната хуманитарна акција „Нахрани 10.000“ за собирање храна е национална акција за донирање храна на одбрани локации и нејзино дистрибуирање до социјално загрозените граѓани. Целта е на граѓаните да им се даде можност редовно да донираат храна до нашите сограѓани преку собирање еднаш месечно на 10 тони храна која ќе заврши во рацете на 10.000 граѓани.