Али Ахмети ја заврши посетата на Брисел, Хаг и Париз со средба со новоименуваниот директор на Директоратот за проширување на ЕУ, Кристиан Дениелсон, соопштија од партијата.
За време на средбата со Дениелсон, Ахмети изразил надеж дека Македонија ќе добие датум за преговори за време на неговиот мандат. Лидерот на ДУИ ги напоменал заедничките достигнување на Македонија во соработка со меѓународната заедница и нагласил дека сите тие постигнувања се загрозуваат со нерешавањето на прашањето со името.
Македонија, рекол Ахмети, се наоѓа пред избор од два правци, патот на интеграцијата или тој на изолацијата. Ние, додал тој, го одбравме патот на интеграцијата како единствена заедничка иднина на сите граѓани на Македонија.
– Токму за тоа решение треба да се дебатира отворено и храбро во нашето општество со поглед кон иднината и да се претстават сите аргументи за и против патот на интеграцијата или тој на изолацијата – порачал тој.
Лидерот на ДУИ за време на посетата приреди и работен ручек за постојаните претставници на Грција и Бугарија при Европската Унија. На ручекот, Ахмети побарал да се интензивира дијалогот помеѓу соседите и страните да седнат да разговараат околу отворените прашања за да се решат час поскоро.