Претседателот на Демократската унија за интеграции Али Ахмети и амбасадорката на Франција, Лоренс Оер, денеска во седиштето на партијата, разговараа за евроатлантските интеграции на Македонија, имплементирањето на Охридскиот договор, како и економскиот развој и меѓусебната соработка.
На средбата, според партиското соопштение, Ахмети го изрази своето задоволство за силната и права определност на францускиот претседател Франсоа Oланд во врска со решавањето на прашањето за името и интеграцијата на Македонија во НАТО и ЕУ.
– Оваа определност не охрабрува за да ги продолжиме нашите напори кон постигнување компромис помеѓу Република Македонија и Грција, рекол Ахмети.
Според него, Охридскиот Договор ќе продолжи да се имплементира, но, како што нагласил, и тој договор е блиску поврзан со изнаоѓањето решение за спорот со името затоа што интеграцијата на Македонија во НАТО и ЕУ носи сигурност, стабилност, ги релаксира меѓуетничките односи, ги унапредува добрососедските односи и овозможува економски развој на земјата.
Амбасадорката на Франција Оер изрази благодарност за одличната соработка со сите претставници на ДУИ во извршната власт, а таа, според соопштението, ја нагласила готовноста да помогне во сите процеси што ја поправаат климата на толеранција и помирување во Македонија и посебно за евроатлантската интеграција на земјата.
Соговорниците разговарале и за потребата за искористување на фондовите за развој на Европската унија и билатералната соработка помеѓу нашите две земји.