Ад-хок комисијата за расчистување на случувањата од 24. декември минатата година пред и во Собранието ќе ги разгледува сите снимки од Парламентот од тој ден и ќе побара мислење и дополнителни снимки од политичките партии.
Претседателот на Комисијата Борче Давитковски денеска изјави дека ќе ги користат сите методи и оти ќе се разгледуваат официјалните видео снимки од Собранието и видео материјалите што ги имаат политичките партии.
– Ќе земеме стенограми, официјални видео снимки од Собранието, но ќе ги користиме и видео снимките од политичките партии. Тие сигурно ќе достават свое видување и затоа им дадовме четири до пет дена за да го дадат своето видување за настаните во вид на извештај.
– Во секој случај се она што е во функција да се открие вистината, да се утврдат фактите. Ние сме експертска комисија и мора да ги утврдиме фактите, истакна Давитковски.
Според динамиката на работата на Комисијата, се очекува да се запази рокот од два месеца за подготвување на Извештајот за настаните од 24. декември минатата година.
Формирањето на Комисијата е обврска од мартовскиот договор постигнат меѓу власта и опозицијата, во присуство на европската тројка.
