Вчера во 19.10 часот, на локалниот пат Пробиштип-с.Ратвици, на местото познато како Леговец, автомобил „фолксваген голф“ со скопски регистарски ознаки, управуван од М.С.(23) од Скопје, излетал од патот и се превртел, соопшти МВР.
Во несреќата, на местото на настанот починал сопатникот Ф.С.(24) од Скопје, а возачот се здобил со тешки телесни повреди, констатирани во Клиничката болница Штип. Извршен бил увид од Јавен обвинител и увидна екипа од Полициската станица Пробиштип, велат од полицијата.
Исто така вчера околу 18 часот било пријавено дека пред влезот на железничка станица Тетово, поточно од стојалиштето Ратае кон железничка станица Тетово, на патен премин, патнички воз кој сообраќал на релација Скопје-Кичево удрил во патничко возило „цитроен“, со тетовски регистарски ознаки, во кое се превезувале две лица, кои се здобиле со телесни повреди, констатирани во Општата болница Тетово. За време на вршење увид, во периодот од 17.46 до 20.55 часот, железничкиот сообраќај бил во прекин.