12 прочистувачи на воздух денеска добија градинките „Кочо Рацин“ и „Наум Наумовски Борче“. Донатор е Ротари клуб Скопје – Камен мост. Со ова ќе се оствари значително подобрување на квалитетот на воздухот што го дишат децата за време на нивниот престој во градинката и ќе се намали ризикот од заболувањата на белите дробови и дишните патишта од загадениот воздух.
„Ова е еден од начините на кои се справуваме со загадениот воздух. Голема благодарност до Ротари клубот и општината ќе обезбеди средства за да може сите градинки и сите седум основни училишта во Центар да добијат прочистувачи за воздух“, рече градоначалникот на општина Центар Саша Богдановиќ.
Донацијата е овозможена од фирмата Екотип од произведувачот Blue Air од Шведска.
Претставникот на Ротари клубот нагласи дека проблемот со загадувањето е сериозен. Општина Центар, рече е првата општина која прифати ваквата донација и затоа се заблагодари за покажаната визија.
„Чистиот воздух треба да е привилегија за секого. Тука нема да застанеме. Центар е првата општина со вакви прочистувачи на воздух. Особено ме радува фактот дека расте свеста за неопходноста за чист воздух“, рече Илија Андреевски, генерален менаџер на Екотип.