Независниот синдикат на македонски железници – инфраструктура бара повлекување на владината одлука за прераспределба на вработените од МЖ – инфраструктура во јавните институции. Во спротивно најавува дека доколку некои од вработените против негова волја биде прераспределен, ќе стапат во штрајк.
– Оној момент кога некој од вработените ќе каже дека присилно без негова согласност е прераспределен во друга институција ќе стапиме во штрајк. Колку ќе трае штрајкот ќе зависи од нив, изјави претседателот на Синдикатот, Марјан Ристевски на денешниот состанок со вработените.
Владината одлука за прераспределба, според Ристевски, значи кршење на повеќе закони од сферата на работните односи, а со неа се губи и стручниот персонал во Железници.
Досега, како што информира Ристевски, околу 80 до 90 вработени се викнати на разговори за прераспределување, а немаат информации за точно колкав број ќе бидат прераспределени.