Агенцијата за храна и ветеринарство во рамки на засилените активности за прекинување на синџир од производители, дистрибутери и продавачи на фалсификуван мед, разотрки индивидуални лица и компанија од Кичевско кои продавале фалсификуван производ.
Инспекциските служби во координирана акција со припадниците на Министерството за внатрешни работи, по претходна дојава од граѓанин, на патниот правец Кичево-Другово, деновиве во две возила, пронашле 240 тегли фалсификуван мед, кои според планираното требале да се продаваат на патниот правец Кичево – Охрид.
Како што се наведува во соопштението од Агенцијата, од запленетите количини, земени се мостри за анализа, а по добивањето на резултатите, против сторителите на овој прекршок, ќе бидат поднесени соодветни пријави и ќе им се изречат казни согласно Законот за безбедност на храната.
Инспекциските служби на Агенцијата за храна и ветеринарство утврдија неправилности и кај компанија од Кичевско, која на истиот патен правец, спротивно на одредбите од Законот за безбедност на храната (Службен весник бр. 157 од 2010 година), продавала фалсификуван мед. И во овој случај, се наведува, станува збор за небезбедна храна, несоодветно декларирана како “Кралска храна” и “Љубовен еликсир”, со лажни знаци на мед, која спротивно на член 29, став 1 и 3, од истиот Закон, се продавала без соодветно да е означена. По извршената инспекциска контрола од страна на официјалниот ветеринар, земени се мостри за анализа, а фалсификуваниот мед е одземен и повлечен од промет.
– Со ваквиот начин на продажба на небезбедни производи, оваа компанија свесно ги доведувала потрошувачите во заблуда дека купуваат мед, иако со лабораториските анализи извршени во акредитирана лабораторија, е потврдено дека не станува збор за мед. На компанијата и се изречени мерки и санкции согласно одредбите од Законот за прекршоци и од Законот за безбедност на храната, наведуваат од Агенцијата.
Воедно, се повикуваат граѓаните секоја недоследност во поглед на безбедноста на храната, вклучително и на медот, да ја пријават на инспекциските служби во Агенцијата за храна и ветеринарство.