Управниот одбор на Фондот на ПИОМ денеска ја одржа 25-та седница. Претседателката на Управниот одбор, Јасмина Вукичевиќ на седницата најнапред му даде збор на директорот на Фондот, Никола Мемов за да ги информира членовите на Одборот за активностите што се направени помеѓу две седници.
Мемов нагласи дека исплатата на ноемвриската пензија е извршена и нема никаков проблем во тој дел од работата на Фондот. Исто така тој информира дека е потпишан Анекс на Протоколот за размена на податоци со Управата за јавни приход со кој се дополнува Протоколот и се доуредува размената на податоците помеѓу двете институции. Со тоа, како што рече Мемов, ќе се придонесе размената на податоците да се одвива подобро и ќе се овозможи полесно остварување на правата од ПИО.
Членот на Управниот одбор Љупчо Фармакоски го поздрави потпишувањето на Анексот, како и претходно потпишаните Меморандуми за соработка со Комората на извршители, Агенцијата за национална безбедност и потенцира дека институционалната соработка е многу важна за квалитетот на извршувањето на надлежностите.
Управниот одбор го усвои Предлог – годишниот план за работа на Фондот на пензиското и инвалидското осигурување на Северна Македонија за 2026 година.
Членот на Одборот, Станка Трајкова рече дека станува збор за значаен документ кој ја отсликува целата дејност на Фондот и секој заинтересиран може со неговото разгледување да се информира прецизно и точно за тоа.
Беше усвоена и Предлог – одлуката за именување комисии за попис на имотот на Фондот на пензиското и инвалидското осигурување на Северна Македонија, пензионерските домови, како посебни градежни објекти и клубовите за одмор и рекреација на корисниците на пензија со кои управува Фондот, со состојба на 31 декември 2025 година.
Членовите на Одборот ја разгледаа и Информацијата за финансиската состојба на Фондот на пензиското и инвалидското осигурување на Северна Македонија за периодот јануари – септември 2025 година.
На дневен ред беше и Информацијата за утврдување на стажот на осигурување „докуп на стаж“ директорката на Секторот за остварување на права, Билјана Стојанова рече дека од 2020 година кога законски е утврдена оваа можност, граѓаните го остваруваат ова право. Таа нагласи дека речиси сите барања што се доставени од почетокот на годината досега се решени.