Нов заем од 250 милиони евра ќе земе Македонија идната година, а парите ќе се трошат за сите буџетски потреби, изјави за Капитал во Токио министерот за финансии, Зоран Ставрески.
„Идната година ќе ни бидат на располагање околу 250 милиони евра, дел од нив од Светската банка, а за останатите оваа меѓународна финансиска институција ќе гарантира кај комерцијалните банки за да добиеме подобри услови за позајмување. Парите ќе ги искористиме за финансирање на сите буџетски потреби идната година“, изјави Ставрески за Капитал по средбите со претставниците на Светска банка и ММФ во Токио.
Министерот за финансии за весникот потврдил дека веќе се крои буџетот.
„Се уште не се знае колку точно пари од Буџетот за 2013 ќе бидат одвоени за инфраструктурни проекти, меѓутоа Владата ги има предвид сите препораки од извршниот директор на ММФ, Кристин Лагард, за зголемување на капиталните инвестиции. Идната година дефинитивно повеќе пари ќе се вложат во гасификацијата на земјата, изградбата на патничките и железничките коридори, Луково Поле и неколку други големи инфраструктурни објекти“, изјави Ставрески.