Премиерот Зоран Заев со економските министри денеска се сретна со претставници од Европската банка за обнова и развој кои пројавиле интерес и подготвеност за помош и поддршка на приватниот сектор во Македонија.
Поддршката би се реализирала преку финансиски проекти што вклучуваат развој и едукација на капацитетите на компаниите, поддршка на инвестициите во инфраструктурата, како и експертска помош во законодавството којашто се однесува на економскиот напредок на земјата.
Владината прес-служба соопшти дека премиерот Заев истакнал оти Владата е силно ориентирана кон развој на економијата во Македонија, отворањето нови и подобро платени работни места и финансиска стабилизација на семејствата.
– Затоа ги разгледуваме и ги земаме предвид сите можности во нашата определба да го помогнеме развојот на домашните компании. Свесни сме дека отворањето на евро-атлантските перспективи ќе биде силен поттик и за странски инвестиции и затоа работиме на интензивна реформска агенда што ќе ги обезбеди, рекол Заев.
На средбата, како што се посочува во соопштението, констатиран е поттик на позитивна клима и енергија од новата Влада за развој на државата.
Покрај премиерот Заев, на состанокот присуствуваа и вицепремиерот за економски прашања и координација со економските ресори Кочо Анѓушев, министерот за финансии Драган Тевдовски и министерот за транспорт и врски Горан Сугарески. Од страна на Европската банка за обнова и развој присуствуваа потпретседателот Пиер Хелборн, помошник директорот Олег Левитин, регионалниот директор за Западен Балкан, Холгер Муент, извршниот директор за Македонија, Франс Векерс и директорката на ЕБРД во Македонија, Анка Јоана Јонеску.
Од двете страни изразена е и волја за продолжување на соработката преку проекти што можат да придонесат во подигнувањето на животниот стандард на македонските граѓани.