Министерот за надворешни работи Никола Попоски на работна средба со бизнис-делегација од Јордан го нагласи значењето на македонско-јорданската политичка и економска соработка, притоа посочувајќи дека трговската соработка засега е скромна и оти постои голем потенцијал за нејзино интензивирање, на што заедно треба да работат двете страни.
– Тој, исто така, ја информираше јорданската делегација за нашите надворешнополитички приоритети за членство во ЕУ и во НАТО, како и за досегашните реформи во економскиот сектор и поволните услови за инвестирање во Република Македонија, соопшти Министерството за надворешни работи каде што попладнево Попоски имаше средба со делегацијата од Јордан која е во тридневна посета на Македонија.
Гостите од Јордан истакнале дека нивната посета е прва од претставници од приватниот сектор и дека е добра можност да ги запознаат состојбите и условите за проширување на економската соработка со Република Македонија.
– Тие искажаа задоволство од приемот и интересот од страна на македонската бизнис-заедница, како и од можноста за директни контакти, што отвора нови перспективи за засилување на економско-трговската соработка, соопшти МНР.
Министерството информира и дека делегацијата од Јордан на шефот на македонската дипломатија му пренела порака со срдечни поздрави од јорданскиот министер за економија и покана да го посети Јордан.