Одборот на директори на Светска банка донесе одлука за доделување на кредит на Украина во вредност од 378,4 милиони долари за развој на електроенергетиката, пренесува ТАСС.
Средствата ќе бидат искористени за зголемување на безбедноста на електродистрибутивниот систем и модернизирање на пазарот на електрична енергија.
Проектот ќе помогне за обнова на националната електродистрибутивна мрежа и за зголемување на енергетската безбедност на Украина, изјави регионалниот директор на СБ за Белорусија, Молдавија и Украина, Чимао Фан.
Кредитот е дел од вкупниот пакет на Светска банка за Украина во висина од 3,5 милијарди долари, договорен во март годинава. Досега од овој пакет се доделени 2,5 милијарди долари.