Индија стана вториот најголем снабдувач на санкционирани технологии за Русија, како што се микрочипови, чипови и машински алати, објави Bloomberg, повикувајќи се на изјави на американски и европски претставници.
Според агенцијата, индискиот извоз на микрочипови, чипови и машински алати надмина 60 милиони долари во април и мај, двојно повеќе од претходните месеци, а во јули се зголеми на 95 милиони долари.
Според овој показател, само Кина е пред Индија.
Според последните податоци, речиси една петтина од технологиите кои влегуваат во рускиот воено-индустриски комплекс таму пристигнуваат преку Индија, пренесува американската агенција и потсетува дека извозот на повеќето стоки со двојна употреба директно во Русија е забранет, па затоа е принудена да ги купува во трети земји – понекогаш од подружници на западни фирми или мрежа на посредници.
Во исто време, додека западните сојузници се обидуваат да ограничат некои од овие рути преку Турција и Обединетите Арапски Емирати, се појавија нови центри, како што се Индија, Малезија и Тајланд, според официјални лица запознаени со ова прашање.
Клучен фактор во оваа промена, велат официјалните лица, се огромните залихи на рупии што Русија ги собра од продажбата на нафта.
Оваа зголемена соработка со Русија ја направи Индија цел на санкциите на Европската унија и САД во последните месеци.
Така, во јули американскиот заменик-министер за финансии Воли Адејемо напиша писмо до високи претставници на Конфедерацијата на индиската индустрија, во кое ги предупреди индиските компании на санкции доколку имаат бизнис со рускиот воено-индустриски комплекс.