„Орка холдинг“соопшти дека продала 50 проценти од уделот кој го поседува во „Графички центар Скопје“ на српската компанија „Интернет Груп“ сопственик на електронскиот портал –„Телеграф“, портал со најголем раст и рејтинг во Југоисточна Европа кој месечно достигнува посетеност од преку 5 милиони читатели, преку 16 милиони отворени страници и преку 150 000 читатели од Македонија.
„Уште при купување на групацијата „Медиа принт Македонија“ од „Ост холдинг“, компанијата „Орка холдинг“ најави дека преговара со стратешки партнери од регионот за влез во делот од компанијата“, велат од компанијата.
„Орка холдинг“ најави дека ќе основа и интерактивен портал – „Телеграф МКД“ по примерот на светските модерни интернет портали, кој ќе биде единствениот портал во Македонија составен од независна редакција од 50 новинари која ќе биде активна 24 часа секој ден во неделата.
Новиот веб портал ќе биде достапен во три електронски изданија: на македонски, албански и англиски јазик. Согласно актите на компанијата, по реализација на трансакцијата, во Управниот одбор кој брои 3 члена, еден претставник ќе има групацијата „Интернет Груп“ од Србија.