Грција не се подготвува за банкрот, а истото мислење го имаат и нејзините кредитори, изјавија грчки владини извори одговарајќи на написот во „Фајненшл тајмс“.
Британскиот весник вчера објави дека Грчката Влада се подготвува да прогласи банкрот на државниот долг доколку до крајот на април не успее да постигне договор со кредиторите.
Истите грчки извори истакнаа дека преговорите интензивно продолжуваат со цел да се најде заемно прифатливо решение и нагласија дека ќе се докаже дека „24 април ќе биде уште еден датум на кој нема да се случи крајот на светот“, јави дописникот на МИА од Атина.
– Она што се чини дека ги вознемирува сите е што грчката Влада е решена да стави крај на политиката на штедење, а прашањето за развој да го стави високо на европската агенда. Со нетрпение чекаме да ја видиме статијата што „Фајненшл тајмс“ ќе ја објави на 25 април, изјави висок претставник на грчката Влада.