Компанијата ЕДС, која важи за лидер на пазарот за снабдување со електрична енергија и дел од групацијата PPC, влегува во нова фаза на раст и стратешка насока со назначувањето на Александар Сарџовски за главен извршен директор.
Во неодамнешно интервју, Сарџовски ја истакна посветеноста на компанијата да го задржи угледот на доверлив и стабилен партнер.
„Фокусирани сме на подобрување на оперативното работење, зголемување на конкурентноста и унапредување на услугите за нашите клиенти. Нашата стратегија се заснова на иновации во енергетските услуги, дигитализација на процесите и поддршка на клиентите во нивната транзиција кон поодржливо енергетско работење“, вели Сарџовски.
Тој истакнува дека една од неговите главни приоритети е развојот на нови, флексибилни пакети за снабдување со електрична енергија, внимателно креирани да одговорат на специфичните потреби на различни клиентски сегменти.
„Овие пакети се наменети да одговорат на потрошувачката на електрична енергија кај компаниите – како големи корпорации, така и мали и средни претпријатија. Новите производи за пазарот на електрична енергија вклучуваат долгорочни позиции со фиксна цена, како и производи со комбинација од фиксни и индексирани цени на електрична енергија. Целта ни е да им помогнеме на бизнисите да ја оптимизираат својата потрошувачка, да заштедат и да ја подобрат ефикасноста на работењето. Истовремено, цените што ги нудиме ќе бидат навистина конкурентни, со максимална вредност за клиентите,“ објасни Сарџовски.
Како дел од групацијата PPC — водечкиот енергетски снабдувач во Југоисточна Европа — ЕДС ја црпи својата сила од регионален енергетски гигант кој опслужува повеќе од 8,8 милиони корисници и произведува 32 TWh електрична енергија годишно.
„Членството во PPC групацијата ни овозможува пристап до напредни ресурси и знаење, што ја зајакнува нашата позиција и ни овозможува брзо прилагодување на променливите пазарни услови,“ вели Сарџовски.
Новиот менаџмент на ЕДС нагласува дека компанијата останува фокусирана на зацврстување на својата пазарна позиција преку испорака на одржливи решенија за клиентите.