Ќе се преиспитуваат ефектите од досегашната распределба на земјоделските субвенции, најави денеска ресорниот министер Љупчо Николовски.
Како што рече на брифинг со новинарите, мора да се истражи како е можно толку многу пари да се вложуваат во земјоделството, а притоа Македонија да увезува огромно количество храна.
За овие и други анализи, како и за изготвување долгорочни планови и стратегии за развој на земјоделството, формиран е научен тим кој од утре и официјално почнува со работа. Во тимот членуваат професори од Факултетот за земјоделски науки и храна, а го предводи проф. д-р Јован Аждерски.
– Ќе ги апсорбираме сите стручни капацитети за правилно ориентирање на земјоделството, за остварување поголем принос и извоз, поголема конкурентност, квалитет и индустријализација, истакна Николовски.
Стручниот тим ќе бидe задолжен и за ревизија на распределбата на земјоделското земјиште, за реорганизација на парцелите, консолидација на обработливите површини и ревитализација на системите за наводнување како приоритетни активности.
Одговорајќи на новинарски прашања, министерот соопшти и дека овој месец ќе се бира партнерската организација преку која ќе се врши распределбата на грантот од ЕУ за задругите вреден 1,8 милиони евра.
Во врска со праските во Росоман, пак, за кои Владата обезбеди дополнителни шест денари субвенција, министерот рече дека заклучно со вчера се откупени 370 тони.