Во грчкиот Парламент денеска се очекува да биде доставен нацрт-законот, изготвен од Владата, за ратификување на спогодбата со кредиторите. Овој договор беше постигнат на почетокот на месецот и се однесува на пакетот реформи, предвидени во спасувачката програма на земјата, јави АНА-МПА.
Со спогодбата се отвора патот за отпуштање на следната транша од спасувачкиот кредит за Грција.
Нацрт-законот вклучува мерки за реформите на пазарот на трудот и во сферата на енергетиката, како и намалување на пензиите и зголемување на даноците.
Мерките беа договорени на преговорите меѓу Атина и нејзините кредитори, кои почнаа во октомври и требаше да завршат кон крајот на минатата година.
Нацрт-законот денеска ќе влезе на разгледување во парламентарните комисии, а на 17 мај ќе биде ставен на седница на Парламентот. Гласањето е предвидено на 18 мај.