Поранешниот министер за финансии на Грција, Јоргос Папаконстантину, ќе биде изведен пред суд заради т.н. список „Лагард“, одлучи Парламентот во Атина по бурната расправа и тајното гласање на пленарна седница, јави грчкото Национално радио.
Мнозинството пратеници ги одобрија покренатите обвиненија против 51-годишниот социјалист, кој беше министер за финансии во периодот од 2009 до 2011 година.
Обвинувањата се однесуваат на фалсификување документ, административни престапи и злоупотреба на службената положба.
За овие обвиненија на Папаконстантинуму се заканува затворска казна. Поранешниот министер категорично ги отфрли сите обвиненија, нарекувајќи ги „фарса“, и притоа упатувајќи остри забелешки кон сегашниот лидер на социјалистичката партија ПАСОК Евангелос Венизелос, кој по него го предводеше Министерството за финансии на Грција.
Се смета дека поранешниот министер за финансии е одговорен за начинот на кој се однесувал во врска со податоците за банкарските сметки на Грците во швајцарските банки.
Папаконстантину беше главната фигура при договорањето на спасувачката кредитна спогодба за Грција со другите држави од еврозоната и ММФ.
Во 2010 година француските власти на Атина и го дадоа списокот со имињата на Грци со банкарски сметки во Швајцарија и тоа се случи во момент кога грчката економија беше потресена од големата криза. Грчките власти, меѓутоа, не ги проверија податоците за потенцијално прикривање даноци.
Папаконстантину во Парламентот негираше дека извршил нешто погрешно, изјавувајќи дека ги побарал податоците и и ги предал на истрагата.