Централната банка на Грција објави извештај во кој потврди дека на земјата и се потребни повеќе од 40 милијарди евра за рекапитализација на банкарскиот систем, јави дописникот на МИА од Атина.
Сумата ќе се обезбеди од кредитите кои Грција ги добива од Европската унија и Меѓународниот монетарен фонд. Со тоа ќе се надоместат загубите на банките од реструктуирањето на грчкиот долг и од економската криза во земјата.
Во извештајот се потврдува оценката од мај годинава кога беше утврдено дека . за рекапитализација на банките ќе бидат потребни 40,5 милијарди евра, од кои 27,5 милијарди ќе бидат наменети за четирите најголеми банки: Националната банка на Грција, Алфа банката, Еуробанк и Банката Пиреја.
Уште 1,4 милијарди ќе бидат потребни за промената на сопствениците на некои банки, меѓу кои се трговските АТЕ банката, Протон банката, Т-Банката, како и три кооперативни банки. Други 3,1 милијарди се предвидени за евентуална рекапитализација на банки кои не се сметаат за клучни.