Претседателот на ВМРО-ДПМНЕ, Христијан Мицкоски не знае дали Владата и премиерот Димитар Ковачевски ќе го реализираат неговиот план за ублажување на последиците од кризата. Тој смета дека нивните обврски завршуваат со средбата која ја имаше со Ковачевски.
„Обврската која ја преземавме, е реализирана. Позициите се предадени. Како што знам, ќе има средби, но каков ќе биде процесот – не знам. Немам намера да се вклучувам во комерцијалниот дел. Има лица кои треба да го движат процесот. Го предадовме и предлог законот за измена на Законот за енергетика, за миграција на претпријатијата на регулиран пазар. Тоа е веднаш што треба да се направи“, посочи Мицкоски.
Според него ВМРО-ДПМНЕ продолжува да гради, Владата на ДУИ и СДСМ продолжува да краде.
„Кажав и за чекорите кои треба да ги преземе Владата за следната година да не го поминуваме истиот пат кој го поминуваме оваа година. Не е време за политика, треба да се помогне колку може на граѓаните и стопанството. Стопанството е сериозен предизвик“, додаде Мицкоски.
Според него, македонското стопанство односно фирмите, плаќаат највисока цена на струја споредено со колегите од регионот.