Германската канцеларка Ангела Меркел изјави дека должничката криза во Европа ќе трае уште најмалку пет години.
Меркел рече дека Европа е на вистинскиот пат да ја надмине кризата, но „греши секој кој мисли дека тоа може да биде решено за година или две“.
Кризата пред две години ги зафати европските земји кои беа презадолжени, особено Грција, која за да добие меѓународна помош и да избегне банкрот, мораше да спроведе остри мерки за штедење на барање на другите земји од еврозоната, вклучувајќи ја и Германија.
Меркел, на регионалниот состанок на својата Христијанско-демократска партија, рече дека е време за „малку строгост“ затоа што во спротивно, како што предупреди, Европа нема да може да привлече инвестиции.