Директорот на Фондот на пензиското и инвалидското осигурување на Северна Македонија, Никола Мемов, присуствува и се обрати на 15. средба на директорите на фондовите на пензиското и инвалидското осигурување од државите на просторот на поранешна Југославија и на Република Австрија, што се одржува во Сараево.
Како што соопштија од Фондот, централната тема за разговор на средбата е „Иднината на пензиските системи – предизвици и перспективи“.
Директорот на Фондот, Мемов, во своето обраќање нагласил дека најголемиот предизвик е обезбедување финансиски стабилен и одржлив Фонд. Тој истакнал дека тоа може да се постигне со воведување мерки кои ќе овозможат зголемување на приливот на средства во Фондот.
– За таа цел до Министерството за социјална политика, демографија и млади предложивме повеќе мерки со кои сметаме дека ќе се подобри финансиската состојба на Фондот. Сметам дека начинот е во зголемувањето на приливот, а не единствено со зголемувањето на стапката на придонеси или старосната граница за пензионирање, рекол Мемов.
Додал дека е потребно зголемување на можностите за финансирање на средствата од вториот столб и намалување на ограничувањата кои се сега на сила, но и разгледување на можноста за инвестирање на средствата и од првиот столб за да се овозможи пасивен прилив и по тој основ.
Меѓу предложените мерки, потенцирал директорот Мемов, е и таа за вработување на корисниците на пензии, со што тие ќе продолжат да ја користат пензијата, ќе имаат дополнителен приход, а Фондот ќе има прилив на средства врз основа на платени придонеси.
Директорката на Секторот за остварување на права од пензиско и инвалидско осигурување во ФПИОСМ, Биљана Стојанова во својата презентација се осврнала на состојбата со бројот на осигуреници, нивната структура, како и на измените во Законот за пензиско и инвалидско осигурување од минатата година досега, а кои се однесуваа на линеарното зголемување на пензиите во септември минатата и март оваа година.
– На средбата стана збор и за реализацијата на заклучоците од претходниот состанок минатата година, при што беше речено дека е остварен значаен напредок во размената на податоците и подобрувањето на соработката помеѓу Фондовите, се наведува во соопштението од Фондот.